Qida zəhərlənmələrinə qarşı ciddi tədbirlər görülməlidir – Mütəxəssisdən vacib xəbərdarlıq

Qida zəhərlənmələri bakteriyalar, onların toksinləri, viruslar, parazitlər və ya kimyəvi maddələrlə yoluxmuş qida və suyun istehlakı nəticəsində yaranan xəstəliklərdir. Bu hallara xüsusilə yay aylarında daha çox rast gəlinir.

Yüksək temperatur bakteriyaların çoxalması üçün əlverişli şərait yaratdığından, bu dövrdə qidaların daha tez xarab olması və müxtəlif mənşəli zəhərlənmələrə səbəb olması ehtimalı artır.

BiG.AZ-a açıqlama verən sağlam qida təbliğatçısı Asim Vəliyev bildirib ki, son dövrlərdə ölkəmizdə qida zəhərlənməsi hallarında artım müşahidə olunur və yay mövsümündə bu hal daha da güclənə bilər:

"Yüksək temperaturda qidaların tez xarab olması, saxlanma və hazırlanma proseslərində gigiyena qaydalarının pozulması qida zəhərlənmələrinin əsas səbəblərindəndir. Bu cür halların qarşısının alınması üçün qida məhsullarının düzgün saxlanma şəraiti – xüsusilə də soyuducu temperaturunda saxlanması vacibdir".

Mütəxəssisin fikrincə, qida istehsalı və satışı ilə məşğul olan obyektlərdə sanitar-gigiyenik tələblərə ciddi şəkildə əməl olunmalı, vaxtaşırı nəzarət və yoxlamalar həyata keçirilməlidir.

Eyni zamanda:

İctimai maarifləndirmə tədbirləri genişləndirilməli,

İstehlakçılar düzgün qida seçimi və saxlanma qaydaları barədə məlumatlandırılmalı,

İstehlak müddəti bitmiş məhsulların satışına qarşı ciddi nəzarət tətbiq olunmalı və məsul şəxslər inzibati məsuliyyətə cəlb edilməlidir.

O vurğulayıb ki, yay mövsümündə xüsusilə süd və süd məhsulları, ət və ət məhsulları, kremli şirniyyatlar kimi tez xarab olan məhsullara qarşı diqqətli olmaq lazımdır.

"Qida təhlükəsizliyi yalnız dövlət qurumlarının deyil, həm də vətəndaşların məsuliyyətidir. Açıq havada və sanitar şəraiti şübhəli olan yerlərdə qida qəbulundan çəkinmək, sağlamlığın qorunması üçün vacibdir. Sağlam cəmiyyətin təməli təhlükəsiz və keyfiyyətli qidalanmadan keçir", – deyə Asim Vəliyev əlavə edib.

Telegramda izləyin